27-мо издание на Меѓународен театарски фестивал “Денови на комедија”
Вечерва со свечено отворање започна 27-мото издание на Меѓународниот театарски фестивал “Денови на комедија”, во организација на НУ Центар за култура Трајко Прокопиев – Куманово, под покровителство на градоначалник и Совет на општина Куманово и Министерство за култура и туризам на РСМ.
На ова издание со свои претстави учествуваат театри од Македонија, Србија и Бугарија: Национална установа Центар за култура “Григор Прличев” – Народен театар Охрид, Драматично – куклен театар од Враца и “Иван Радоев” од Плевен (Бугарија), Позориште “Бора Станковиќ” Врање и Народно позориште Ниш (Србија), Театар Комедија, Национална установа Тетовски театар, Национална установа Центар за култура “Ацо Шопов” Народен театар Штип, Национална установа Центар за култура “Трајко Прокопиев” (Кумановски театар и Албанска драма). Вечерва љубителите на театарската уметност имаа можност да ја проследат претставата “Вечера за глупаци” на Театар “Јордан Хаџи Константинов Џинот”- Велес.
Градоначалникот на општина Куманово Максим Димитриевски го прогласи за отворен 27-миот Меѓународен театарски фестивал “Денови на комедија”, истакнувајќи дека овој традиционален театарски фестивал претставува можност да избегаме од секојдневните обврски, во еден свет кој искрено ќе не насмее и доближи до уметничкиот контекст, со цел да го прошириме погледот на свет, учејќи повеќе да ги цениме перспективите на другите.
Лауреат на овогодинешното издание на “Денови на комедија” е театарскиот и филмски актер од Куманово Сашко Коцев, кој ја понесе наградата “Васил Иљоски” за 2024 година, за особен придонес во театарската уметност, посебно во делот на комедијата.
