Во периодот од 15 до 18 јуни 2026 година, делегација составена од градоначалници и секретари од шест македонски општини учествуваше на студиска посета во Хрватска, посветена на развојот на граѓанските енергетски заедници. Претставници на општините Куманово, Битола, Кичево, Новаци, Демир Капија и Вевчани ги посетија Загреб, Пушќа, Забок, Крижевци и Риека, каде се запознаа со успешни модели за активно учество на граѓаните и локалните самоуправи во производството, споделувањето и управувањето со обновлива енергија.
Студиската посета, организирана од “Еко – свест” со поддршка на Фондацијата Хајнрих Бел и Шведска, придонесе за зајакнување на капацитетите на локалните самоуправи и отвори простор за понатамошна соработка и размена на искуства.
Споделеното искуство ќе им помогне на македонските општини полесно да ги применат новите законски можности и да развиваат локални енергетски иницијативи, што ќе придонесат кон исполнување на националните климатски и енергетски цели.
