Во кружната сала на зграда на поранешни општествено – политички организации се одржа Регионален форум на Североисточен плански регион за одржлив третман на биоотпадот, во рамки на проектот „Нула биоотпад: Системски промени во партнерство со граѓаните“. Овој проект е поддржан од Владата на Швајцарија преку Програмата „Цивика мобилитас“, а спроведуван од Здружението за еколошко одржлив развој „Зелен институт“, во партнерство со Националното здружение на сопственици на приватни шуми.
Целта на проектот е да придонесе кон транзиција на општините во рамки на концептот „нула отпад“ преку подобрување на управувањето со биоотпадот, намалување на загадувањето и ризиците од пожари, поефикасно искористување на ресурсите и поттикнување на циркуларната економија.
На форумот беше презентирано базичното истражување за управување со биоотпадот, кое опфаќа анализи на количините и составот на биоотпадот, можните технологии за третман, финансиските аспекти и институционалните модели за негово управување. Заклучоците од форумот ќе послужат како основа за изработка на предфизибилити студија и обезбедување финансиска поддршка за идните решенија.
На настанот присуствуваа градоначалници и директори на јавните комунални претпријатија од Куманово, Кратово, Крива Паланка, Липково, Ранковце и Старо Нагоричане, како и претставници на институции и стопанството.
