Бадникова поворка во Куманово

Во Куманово по единаесетти пат се одржа традиционалната манифестација во чест на големиот христијански празник, Бадникова поворка, составена од деца и родители, во организација на здружението “Бадникови поворки” – Скопје, со поддршка на Фондацијата за култура и спорт Куманово. Поворката ја предводеа коледари, кои и оваа година тргнаа од Соколанскиот парк, до градскиот плоштад, ја носеа пештерата со икона на Богородица и Исус Христос и пееја божиќни песни со ѕвезди во рацете. Градоначалникот на Општина Куманово, Максим Димитриевски и претседателката на Советот на Општината, Ивана Ѓорѓиевска, на учесниците во Бадниковата поворка, во Занаетчиски дом, им поделија божиќни подароци, со желби за среќа, благосостојба и добро здравје. Празничниот настан беше збогатен со културно – уметничка програма, во духот на традицијата, со песни и стихови, во изведба на децата бадникари, кои учествуваа во поворката.