Првиот буџетски форум на Општина Куманово во рамки на проектот “Заедници со интегритет”, финансиран од владите на Швајцарија и Шведска, спроведуван од Националниот демократски институт (NDI), беше реализиран денеска во Занаетчиски дом.
Секретарот на Општина Куманово, Емилија Сларидис Јаневска, со пригодни зборови го отвори настанот, во присуство на претседателката и членови на Советот на Општината, претставници од општинската администрација, јавните претпријатија и установи, здруженија на граѓани, невладини организации, претставници од бизнис секторот и др.
Сите заинтересирани граѓани кои пројавија интерес да учествуваат на отворениот јавен форум, односно на првите два форума (28.10.2026 год. и 30.10.2026 год.), ќе имаат можност да даваат предлози, идеи и забелешки за креирање на буџетот на Општина Куманово за 2027 година, а на третиот форум (03.11.2026 год.), ќе се врши финална селекција и рангирање на конкретните предлози.
Во буџетските форуми опфатени се повеќе области: економија, инфраструктура, образование, социјална заштита, животна средина, култура и спорт. Целта на отворените јавни настани е активно вклучување и учество на граѓаните во креирање на буџетот на Општината.
