Реакција на Градоначалникот Максим Димитриевски за потпишан меморандум помеѓу Општина Куманово и „Меѓународен сојуз„

Поради интерес на јавноста, јавно го објавуваме Меморандумот за соработка склучен помеѓу Општина Куманово и Асоцијацијата за заштита на цивилно општество и социјално загрозените категории “Меѓународен сојуз” Скопје кој е потпишан на 07.12.2017г. со важност од една година. Оваа е вообичаена процедура при средби помеѓу невладини организации и институции и овој документ – меморандум не содржи обврзувачки дејствија туку истиот е протоколарен. Од овој меморандум не се реализираше ниту една активност и истиот е вон сила. Изминативе неколку денови, во медиумите се појавија шпекулации, а прашања стигаат и на адресата на Општина Куманово, градоначалникот Максим Димитриевски и неговите “релации” со Бојан Јовановски, познат во јавноста како Боки 13. Вистината што стои зад овие вести е дека, единствено е потпишан меморандум за соработка со „Меѓународен сојуз Скопје“ на 7ми декември, 2017 година со важност од една година, но ниту една активност или проект врз основа на овој договор не беа реализирани.

“Категорично ги отфрлам сите шпекулации дека јас на каков било начин поврзан со целиот настан кој ја бранува јавноста. Единствено што мене и општината не поврзува со оваа невладина организација е потпишаниот меморандум за соработка помеѓу Општина Куманово и „Меѓународен сојуз Скопје“ чиј претседател е Бојан Јовановски, но одговорно тврдам дека во времетраење од една година на договорот, ниту една активност не беше спроведена. Дополнително стојам на располагање за сите прашања што ја засегаат јавноста, поврзани со ваквите погрешни тврдења“ – изјави градоначалникот Максим Димитриевски.

Градоначалникот е на страната на правдата и повеќе пати повика на интензивна истрага и експедитивна разрешница на  случајот ,,Рекет”.